UR-URAYEN TI KANIBUSANAN TI LUBONG

Ti Armagedon ken Apocalipsis addadan iti tangatang. Ti idadateng ti baro a siglo ken ti baro a milenio (1,000 tawen) degdeganna ti alusaisen a ricna maipapan iti canibusanan ti isuamin. Dagiti dadduma padpadaananda ti panungpalan toy lubong ken ti panagsubli ni Jesu Cristo intono Enero 1, 2000.

Adda dagiti datdatlag a bambanag a mapaspasamac. Cas pangarigan, ti maysa a bassit a bunggoy dagiti Cristiano immalisdan idiay Bantay ti Olivo, iti ruar ti Jerusalem, a tumulong kano iti isasangpet ti maicadua a yaay [ni Cristo]. Iti sabali met a pasamac ti gobierno ti Israel bimmallaet ket pinasardengna ti sinan-Cristiano a panangtulad cadagiti mapasamacto ti Armagedon—ti nairanta a panangkita sacbay ti yuumay ti sumungad a didigra. Pinagtalawda dagiti camcameng ti sabali a bunggoy a ti panguloda impadtona ti nacana nga ipapatayna idiay Jerusalem intono Deciembre. Saan pay a nabayag, ginasut dagiti camcameng ti sabali pay a bunggoy dagiti mammati iti canibusanan toy lubong a nagpucaw iti nasulinec a cabambantayan idiay Colombia.

Ti gusoguso maipapan iti milenia casta unay ti caribuso bayat ti umas-asidegen a panagserra ti 1999. Adda latta dagiti Cristiano a nacaro unay ti pammatida ket ammoda kano ti apag-isu a panagsubli ni Cristo ket padpadasenda a pasamakenen. Anian nga ki-naawan serserbina iti Dios dagitoy nga ar-aramid. Ni Cristo ti Apo ken Maestrotayo—saan nga iti kabalictadan (Juan 13:13).

Nupay casta, imbagana cadatayo nga agsiput tayo babaen iti maipaspasamak idtoy lubong maipapan iti sumungad nga panagparangna. "Agsiputcayo ket agcararagkayo a kankanayon tapno addanto naan-anay a kiredyo nga agibtur cadagiti amin a mapasa-mac, ken agtacder iti sangoanan ti Anak ti Tao" (Lucas 21:36), ngem asitgantay ida iti nasimbeng ken natanang a wagas—ditay pulos gay-aten ti mangituding iti petsa.

AWAN TI TAO A MACAAMMO ITI APAG-ISU A TIEMPO

Intono mapasamac, ti isusubli ni Jesu Cristo mapagteng a cas cadagidi napangruna ken nacalallagip a paspasamac cas iti panamarsua, ti layus idi panawen ni Noe, ken ti immuna a yaay ni Cristo. Ngem inlasin ti Dios Ama a para Kencuana a mismo ti pangngeddeng iti apag-isu a tiempo a mapasamac dayta. Uray pay ni Jesu Cristo a mismo dina ammo idi no inton caano. (Mateo 24:36).

Intultuloy dagiti disipulo ti napinget a panagsaludsodda calpasan ti panagungarna iti agnanayon a biag. Cayatda pay laeng a maammoan no caano. Isu met laeng ti inted ni Cristo a sungbat a cas idi damo: "Saan a naited cadacayo ti pannacaammo cadagiti tiempo ken pasamac nga inkeddeng ti Ama babaen ti turayna" (Aramid 1:7).

No ibatay iti pacasaritaan ti lubong, daytoy a sungbat narigat nga awaten dagiti tattao. Uray no cascasano cayat tayo a saliw-anan ti mismo a sao ni Jesus ket pattapattaentayo ti wagas tapno maammoantayo koma ti apag-isu a tiempo.

Bayat ti ilalabas ti ngangani 2,000 nga tawen adu dagiti napiltacan iti iclog ti rup-rupada. Masansan dagiti nacapingpinget ti panagkibaltangda a nangituding cadagiti petsa nga dimteng ken pimmanaw a dimet nagparang ni Jesu Cristo. Mapanunot coman ti maysa a naadaltayon ti lecsiontayo cadagitoyen.

Nupay casta, adu ti casla agduyos iti daytoy a pagcapsutan. Uray dagiti immuna nga apostoles saanda a nailacsid, ta impagarupda nga agsubli ni Cristo iti unos ti panagbi-agda. Ngem iti arinunos ti biagda naaddaandapay ti napaypayso a pannacaawat (kitaen ti 2 Pedro 3; 2 Timoteo 4).

Tapno nasaysayaat ti pannacaawattayo iti capanunotan ti Dios, kitaentayo apagbiit da-giti escritura maipapan iti umuna ken maicadua a yaay ni Cristo a maibatay iti panangi-wanwan ti Biblia.

IMMUN-UNA A SIAANNAD A NAPLANO

Siaannad ti pannacaplanona a pasamac ti immuna a yaay ni Jesu Cristo. Saan a na-pasamac a basta naiparparna wenno iti nailaw-an a tiempo ti pacasaritaan ti lubong. Ibaga ti Biblia cadatayo nga "Idi dimtengen ti tumutop a tiempo, imbaon ti Dios ti mismo nga Anacna. Immay a cas anac ti nataoan nga ina, ket nagbiag iti babaen ti Linteg" (Gala-cia 4:4, nainayon ti panangigunamgunam).

Dagiti dadduma a panangitarus inyebcasda a cas "ti naituding a tiempo," "ti apag-isu a panawen," wenno agpapada nga panangisawang. Ti Dios ipasdecna dagiti plano ken tiempona, ket diay "naituding a tiempo" isu ti nagcaysa a panawen a cabatogan ti plano ken panggepna.

Cas Cordero ti Dios ni Jesu Cristo "napapatay sacbay ti pannacaparsua ti lubong" (Paltiing 13:8; Juan 1:29), ngem ti pudpudno a pasamac saan a naaramid iti panaglabas ti sumagmamano a ribu a tawen. Ngangani 2,000 nga tawenen ti naglabas nanipud idi pan-nacapatay ken panagungarna. Ngem, cas ipalagip cadatayo ti Hebreo 9:28, "Namimpin-san a naidaton ni Cristo a mangiccat iti basol ti adu. Agparangto iti maicadua a daras, ngem saanen a gapu iti basol, no di ket tapno isalacanna dagiti sisisegga nga agur-uray Kencuana."

Segun cadagiti escritura agpada dagitoy a yaay a nagsilpo ken nagsinggalotda (Isaias 61:1-2), nupay casta, nawatiwat a tiempo ti nagbaetan dagitoy dua a pasamac. Agpadada a napangruna nga addang iti plano ti Dios nga agpaay ti sangcataoan.

Utobenyo dagiti balbalicas ni apostol Pablo iti iglesia idiay Efeseo: "Nawayawayaan-tayo babaen ti ipapatay ni Cristo. Napacawan met dagiti basoltayo. Anian a nagdackel ti parabur ti Dios nga impaayna a sibubuslon cadatayo! Iti amin a kinasirib ken pan-nacaammo, inaramid ti Dios ti pinanggepna. Impacaammona cadatayo ti nalimed a planona nga inkeddengna a tungpalen babaen ken Cristo. Ania ti plano ti Dios a tung-palenna inton dumteng ti naituding a tiempo? Isu daytoy: Pagmaymaysaenna a pan-nacaulo ken Cristo dagiti amin a parsua idiay langit ken ditoy daga" (Efeso1:7-10).

Ibagbaga ditoy ni Pablo iti tiempo a di-pagduaduaan nga nairamanna ti maicadua a yu-umay ni Cristo nupay kasta masirmata nga aglabes pay iti dayta a napangruna a pasamac.

TI TIEMPO NGA INTUDING TI DIOS

Natalgedtayo a mangsinnunuo nga awan ti naindaclan a pasamac ti padto a maaramid nga awan ti pannacaammo ti Dios, no di Isu ti mangiturong ken Isu ti mairaman. Iti panangkitatayo iti naglabas, dagiti napangruna a paspasamac napagtengda "iti naituding a tiempo" (Efeso 1:10), saan a sacbay.

Pinalawag ti Biblia a ti Dios antabayan ken iturongna dagiti paspasamac a mangi-patungpal cadagiti pangngeddengna. "Maaramid dagiti amin a bambanag cas mayan-nurot iti plano ken pangngeddeng ti Dios" (v. 11).

Ibaon ti Dios Ama ni Jesu Cristo nga agsubli ditoy daga iti apag-isu a tiempo. Saan a casla cadatayo, makitana ti entero a ladawan, dagiti isuamin a mapaspasamac ditoy lubong iti aniaman a tiempo. Is-isu laeng ti naan-anay ti pannacaammona iti napalabas ken ti masacbayan.

Iti casumbangirna, masirmata tayo laeng ti bassit a paset ti ladawan. "Ta saan pay a naan-anay ti ammotayo, casta met dagiti naipaltiing a cascasaba" (1 Corinto 13:9).

Nupay casta imbaga cadatayo ni Cristo nga icararagtayo, "Umay coma ti Pagariam" (Mateo 6;10), a silalawag ti panangibagana a cayatnatayo a paggagaraan ken pagsiggaan-tayo a biruken ti tiempo a panangikeddengna iti iballaetna cadagiti ar-aramid ti sang-cataoan. Cabayatanna, taripatoentay a nalaing ken urnosentay a naimbag ti espiritual a cabibiagtayo (Lucas 21:29-36).

NATANANG A BALBALICAS A PANGBALLAAG

Siaannadtayo coma a dumngeg cadagiti balbalicas ni Jesu Cristo iti ballaag ti padtona idiay Oliveti, a naited casacbayan unay ti ipapatayna: "Daytoy ti gapuna a no adda ag-cuna, 'Kitaenyo, adda ditoy ti Cristo!' wenno 'Adda sadiay!' diyo patpatien. Ta ag-parangto dagiti sinan-cristo ken dagiti sinan-profeta, ket agipakitadanto cadagiti nain-daclan a pagilasinan ken nacascasdaaw a banag tapno, no mabalin, yaw-awanda uray dagiti pinili ti Dios...Ngarud, no cunada, 'Kitaenyo, adda nga aglemlemmeng ditoy!' dityo patpatien" (Mateo 24:23-24, 26).

No maawatan coma laeng dagiti tattao ken tungpalenda dagiti mismo a sasao ni Jesus, saanda coma nga agipasdec cadagiti pagtaenganda idiay Bantay Olivo wenno dida coma isapsapa a pasamaken dagiti paspasamac ti Armagedon. Napaypayso a ti maicadua a yu-umayna sangalubongan a pasamac (v. 30). "Ibaonto ti Anac ti Dios dagiti anghelesna cadagiti uppat a suli ti lubong sadanto urnogen dagiti tattao a pinili ti Dios, manipud iti maysa a pungto ti daga agingga iti sabali" (v.31).

Namnamaen ni Jesus kadagiti pasurotna nga "icasabadanto iti entero a lubong ti Naimbag a Damag maipapan iti Pagarian ti Dios cas pammanecnec dagiti amin a tat-tao" (Mateo 24:14) ken iranudda ti Kinapudnona ken dagiti bilbilinna iti entero a lubong (Mateo 28:18-20). Urayentayo a napnoan ti pammati ken panaganus iti isusublina (Lucas 21:19), ta ammotayo a ti "siasinoman a macaibtur inggana panungpalan maisala-canto" (Mateo 24:13).

[Original article: Waiting for the End of the World by John Ross Schroeder printed in The Good News Magazine, November-December 1999 issue; published by the United Church of God, an International Association, with office address at 5405 DuPont Circle, Suite A, Milford, Ohio 45150, U.S.A. Internet Website: www.ucg.org. The original article was translated into the Ilocano language by Pedro A. Fabroa and edited by Edmond D. Macaraeg.]