ILOCANO

LADAWAN TI PAMMATI: PEDRO
Mangngalap Iti Lames Nagbalin a Mangngalap Iti Tao

Simmipnget ti tangatang ken nacabutbuteng ti rabii bayat ti panangsaplit dagiti naalicuteg nga angin cadagiti dalluyon a siraranggas a mangdungdongpar iti bilog ni Pedro. Dagiti lallaki iti uneg ti bilog, adalan amin ida ni Jesu Cristo, casta unay ti rigatda nga agga-ud a sumaranget iti napigsa nga angin, ngem sangcabassit ti umacaran ti bilogda. Nupay ta napeggad dagiti casasaad, nangnamnamada a macasangladda iti igid ti saplaya ken kinatalingenngen.

Dagiti tattao nga agnaed wenno agbibiag iti aglawlaw ti Baybay ti Galilea ammoda ti managbaliw a casasaad daytoy nacalma a bagi ti danum. Mabalin a kellaat lattan a rumsua ti napigsa nga angin nga awan pammallaagan. Awan gundaway dagiti aglaylayag iti Baybay ti Galilea a mangammo iti casasaad ti panawen. Ngem nairruamdan a mangpalpaliiw iti tangatang, sipsiputanda dagiti naammoandan a pagilasinan a macaipadto iti isusungad ti nacaro a panawen.

Iti maicapat a panagbantay iti rabii naisagmac dagiti pasurot ni Jesus iti nacaro a casasaad, ta sarsarangetenda iti napigsa nga angin ken nadawel a dalluyon. Iti nagbaetan ti amac a mapucaw ti biagda iti baybay – adda latta pannacabalinna iti casta a bagyo – ken ti narigat ken macactang a panagga-ud a cumamang iti pacaisalacanan, bigla lattan a naclaatda. Pagammoan, awan pulos pammallaagan, nakitada iti maysa a tao a magmagna iti rabaw ti danum iti asidegda. Iti napalalo a pannacakellaat ken butengda padapada a nagriaw, “Adda al-allia!” Ngem ti “al-allia” awan sabali no di ti Apoda, a ni Jesus. Dagdagus a pinatalgedna ida: “Dicay agbuteng! Siac ni Jesus. Dicay agdanag!” (Marcos 6:50).

Cas cababalinna, ti cancanayon a narugso a Pedro isut’ immuna a nagsao: “Apo, no agpayso a Sica, ayabannac man dita yanmo a magna iti rabaw ti danum” (Mat. 14:28). Ket inayaban ni Jesus.

Ti simmaruno iladawanna ti agpada a kinacapuy dagiti tattao ken ti espiritual a kinapigsa ti Dios. Dackel ti pacaidayawan ni Pedro iti panangipakitana iti kinatallugodna a mangpadas iti di-mabalinan ti tao – ti napaypayso a pannagna iti rabaw ti danum.

Apaman a nangngegna ti natalged ken macapakired-nakem a timec ni Jesus, dimsaag ni Pedro idinto ta awan cadagiti dadduma ti nacaitured a pimmanaw iti natalingenngen a bilog. Inrugina ngarud ti nagna nga agturong iti Apona, casla nacalaclaca ti panangaramidna iti di coma mabalin nga aramiden.

Ngem ti agal-allawig nga angin ken narurungsot a dalluyon pinucawda ti panangipamaysana iti aramidna. Nangrugi a lumned ni Pedro iti nadawel a baybay, ket casta unay ti butengna. Intangadna ken ni Jesus dagiti napnoan amac a matmatana ket inyickisna, “Apo, isalacannac!” (versiculo 30). Dinagdagus ni Jesus nga inggawawa ti imana ket ginammatanna iti nairut ti ima ni Pedro. Indiaya ni Jesus dagiti sumagmamano a napnoan pammatalged a balicas ti pannursuro ken pangliwliwa: “Nagbassit ket ti pammatimon! Apay a nagduaduaca?” (versiculo 31).

Daytoy a pabuya ti biag, maysa cadagiti adu a naisarita iti sumagmamano a versiculo dagiti Ebanghelio, mangted cadatayo iti nabileg a lecsion ti pammati. Daytoy a kita ti natalged a panaglangenlangen maysa a parabur ti Dios ngem parabur a masapul a taracnen ken aramaten.

Napno ti biag ni Pedro cadagiti macasalibucag a lecsion; sumagmamano laeng ti naisarita ditoy. Iti daytoy nga articulo ibilangtayo dagiti macatulong cadatayo a mangidilig cadagiti dadduma a capadasantay iti biag ken dagiti padpadas ni Pedro, ket napacuyogan iti namnama a dagitoy a lecsion macatulongda iti panagdackeltayo iti gracia ken pannacaammo ken Cristo (2 Pedro 3:18).

TI PANGGEDAN NI SIMON PEDRO

Nupay bassit ti ipalgac ti Biblia maipapan iti biag ni Pedro sacbay a nasaracanna ni Jesus, ti dadduma a paset ti naglabas a cabibiagna maammoantay cadagiti maisarsarita ken pudno a pacasaritaan [ti lubong]. Simeon met ti nagan ni Pedro – capada ti nagan ti panglacayen ti maysa cadagiti 12 a tribo ti Israel – a napaababa iti Simon. Cadagiti Sursurat naawagan met iti Simon bar Jona (caipapananna ni Simon nga anac ni Juan). Nalabit nayanac idiay ili wenno asideg ti ili ti Betsaida-Julio (Juan 1:44), iti amianan a deppaar ti igid ti Baybay Galilea. Ti nagan ti ili caipapananna iti “balay ti mangngalap,” ket nagsaad iti apaman a daya iti Carayan Jordan. Adda daytoy iti ruar ti provincia ti Galilea nga iturturayan ni Herodes Felipe, maysa nga anac ni Herodes a Dackel.

Ti ili a Betsaida-Julio pagnanaedan ti caadoan a bacnang a Judio ken Greico. Mabalin a da Simon Pedro ken ti cabsatna nga Andres nakipagnegosioda cadagiti Judio ken Greico ket mabalin a nagsasaoda iti Aramaica casta met ti bassit a Greico.

Sacbay a nasaracan ni Simon Pedro ni Jesus, nagnaed iti ili ti Capernaum, sumagmamano a milya caadayona iti laud, ket adda asawana (Mateo 8:14). Ditoy ti nakicappunanna a caduana ti cabsatna nga Andres cada Santiago ken Juan, nga annac ni Zebedeo (Lucas 5:10).

TI PANNACAAYAB NI PEDRO

Pinadpadaanan ni Andres ken ni Juan ti panagparang ti Mesias, ta napnapanda idiay valye ti Carayan Jordan a dimngeg ken ni profeta Juan Bautista (Mammunniag), casinsin ni Jesus a taga-Nazaret. Incascasaba ni Juan Bautista ti yaay ti Mesias, ket binallaaganna dagiti cailianna nga agbabawida.

Nagbalin pay ketdi da Andres ken Juan nga adalan ni Juan Bautista. Idi intudo ti maestroda ni Jesus cadacuada nga isu ti Cordero ti Dios, imbaga ni Andres ken Pedro, “Nasaracanmi ti Mesias!” (Juan 1:41). Impan ni Andres ti cabsatna ken ni Jesus, ket idi kimmita ni Jesus kencuana kinunana: “Sica ni Simon nga anac ni Juan. Managancanto iti Cefas” (versiculo 42).

Ti “Cefas” iti saot’ Aramaica caipapananna “bato” – cas met la iti saot’ Greico a Petros , a nayulog iti Ingles cas Peter. Isu a castoy ti nacapanaganan ni Simon bar Jona a cas Peter (Pedro).

Adda dadduma nga escolar nga agcuna a ni Pedro naayaban iti tallo a daras, ti umuna isu ti naisaritan iti ngato idi damona a masaracan ni Jesus. Ti maicadua a daras ti pannacaaayabna impatuldo dagiti escolar iti tiempo idi magmagna ni Jesus iti igid ti Baybay Galilea, nakitana da Pedro ken Andres nga agisarsarwag iti tabucol iti baybay. Kinunana cadacuada, “Surotendac ket pagbalinencayto a mangngalap cadagiti tao” (Mateo 4:19).

Ti maicatlo a daras ti pannacaayab ni Pedro naicuna idi “inayabanna dagiti adalanna ket pimmili iti sangapulo ket dua cadacuada a dinutocanna nga apostoles: ni Simon, apinanagananna pay iti Pedro…” (Lucas 6:13-14).

SIMMUCO TI MANGNGALAP ITI DIOS

Nanursuro ni Jesus cadagiti tattao iti igid ti Baybay ti Galilea. Idi immadu dagiti tattao nga immasideg Kencuana, kinitana ti lawlawna ket nakitana ti dua a bilog iti asideg. Limmugan ni Jesus iti bilog ni Pedro sana kiniddaw kencuana nga icayacayna bassit [ti bilog] iti igid tapno nasaysayaat ti panangisurona cadagiti umad-adu a tattao. Ti rabaw ti danum ti nangpapigsa iti timecna, ket nalaclaca ti panangdengngeg dagiti tattao Kencuana.

Idi nalpasen a nagbitla ni Jesus, imbagana ken Pedro nga yad-adayona ti bilog iti ad-adalem a paset ti danum ket itapugna dagiti iketna sadiay (Lucas 5:4). Idi damo nagkedked ni Simon ta nagpatnag a nagcalapda ket awan ti naalada, ngem sana kinuna, “…ngem no casta ti cunam, iwayatco dagiti iket” (versiculo 5).

Nasayaat dayta nga inaramidna. Pagammoan napno ti iket [iti lames] ket nangrugin a mabessang. Dinagdagus a pinayapayan ni Pedro dagiti cacapponna, da Santiago ken Juan, nga yasidegda ti bilogda. Di nagbayag, napno ti lames dagiti dua a bilog ket napeggad ti ilelennedda.

Napagsidaaw ken napagpacumbaba iti daytoy namilagroan a pasamac, ket nagparintumeng ni Pedro iti sangoanan ni Jesus, a kinunana, “Apo, adayoannac! Maysaac a managbasol” (versiculo 8). Pinatalgedan ni Jesus ti agpigpigerger a mangngalap: “Dica agbuteng, Simon. Manipud ita, tattaonton ti calapem” (versiculo 10). Manipud idin, ni mangngalap a Pedro nagbalin a Pedro, a mangcalap cadagiti tattao. “Idi insang-atda dagiti bilog, pinanawanda amin, ket simmurotda ken Jesus” (versiculo 11).

NASACSIAN NI PEDRO TI PANNACABALBALIW

Maysa met ni Pedro a nacasacsi, caduana dagiti agcabsat a Santiago ken Juan, iti sabali pay a milagro – ti nalawag a pannacabalbaliw ni Jesus iti naindayagan a casasaad. “Calpasan ti innem nga aldaw, incuyog ni Jesus ni Pedro ken dagiti agcabsat a Santiago ken Juan ket is-isuda a simmang-at iti maysa a bantay. Idiay, nagbalbaliw ti langa ni Jesus iti imatangda; nagraniag ti rupana a cas iti init, ket pimmudaw dagiti pagan-anayna a cas iti lawag. Pagammoan, nakitada da Moises ken Elias a makisarsarita ken Jesus” (Mateo 17:1-3).

Impakita ti Dios cadagitoy apostoles ti umuna a ladawan dagiti dumteng a bambanag. Intono agsubli ni Jesus ditoy daga pagungarennanto nga agpada ti mangmangted-linteg a ni Moises ken ni profeta Elias, ket makipagturaydanto ken Cristo iti Pagarianna.

Nalabit ti cangrunaan a lecsion ditoy isut’ maysa a banag a mabalin a dipay napagpagteng cadagiti disipulo: Ti Apoda, ti Maestro a taga-Nasaret, maipada cada Moises ken Elias, dua cadagiti caindaclan a mannursuro iti isuamin a pacasaritaan ti Israel. Saan la a dayta, silalawag a ni Jesus nangatngato ngem ni Moises ken Elias. “…nagparang ti naraniag nga ulep a nanglinong cadacuada. Adda timec a naggapu iti ulep a nagcuna, ‘Daytoy ti Anacco a dungdungngoec a pacaay-ayoac unay. Dumngegcayo Kencuana!’” (versiculo 5).

Impalgac ti Dios a ni Jesus dacdackel ngem ni Moises wenno ni Elias – Isu ti Mismo nga Anac ti Dios. Calpasan daytoy nadiosan a pammasingked, nadlaw dagitoy tallo nga apostoles a ni laengen Jesus ti cadduada. Dagiti ladawan-arapaap da Moises ken Elias nagpucawdan, ngem adda pay laeng ni Jesus sadiay. “’Awan pangibagbagaanyo iti naimatanganyo. Ibagayonto laeng daytoy calpasan ti pannacapagungar ti Anac ti Tao,” imbilin ni Jesus cadagiti tallo nga adalanna idi sumalsalogda iti bantay’” (versiculo 9). Saanto a pulos malipatan ni Pedro ken dagiti cadduana nga apostoles daytoy dackel a lecsion.

Daytoy naisangsangayan a pasamac ti nangpabileg ken ni apostol Pedro iti entero a panangasaba [ni Cristo]. Apaman a sacbay iti pannacamartirna, impalagipna cadagiti agbasbasa cadagiti sursuratna daytoy nacascasdaaw a pasamac iti camaudian a suratna: “Dicam nagtalec cadagiti naparbo a sarsarita idi impcaammomi cadacayo ti pannacabalin ni Apotayo a Jesu Cristo ken ti yaayna. Nakitami a mismo ti kinatan-ocna. Addacami idi iti sibayna idi maited Kencuana ti dayaw ken dayag a naggapu iti Dios Ama, idi cuna ti timec manipud iti Catan-ocan a Dayag, ‘Daytoy ti Anacco a dungdungngoec a pacaay-ayoac unay!’ Nangngegmi daytoy a timec a naggapu sadi langit idi naicuyogcami Kencuana iti tapaw ti nasantoan a bantay” (2 Pedro 1:16-18).

INLIBAC NI PEDRO NI CRISTO, KET NAGTARAOC TI CAWITAN

Calpasan ti panangsalimetmet ni Jesus ken dagiti apostolesna ti Pascua iti rabii sacbay ti pannacailansana iti crus, immulida iti Bantay Olivo.

“Kinuna ni Jesus cadacuada, ‘Iti daytoy met la a rabii, panawandacto, dacayo amin, agsipud ta cuna ti Nasantoan a Surat, “Patayento ti Dios ti agpaspastor ket mawarawaranto ti arban dagiti carnero.’

“Insungbat ni Pedro, ‘Uray pumanawdanto amin, dicanto panawan.’ Kinuna ni Jesus kencuana, ‘Laglagipem daytoy: Sacbay nga agtaraoc ti cawitan ita a rabii, namitlonton nga inlibacnac!’ Insungbat ni Pedro, ‘Uray matayac a mairaman Kenca, pulos a dicanto ilibac.’ Casta met ti kinuna dagiti amin nga adalan” (Mateo 26:31-35).

Naawatan ni Jesus ti kinacapuy ti lasag ken nakemtayo – nga awan ti bileg-nakem ken pinget a mangaramid ti ammotayo a rebbengentayo. Naawatanna met nga awanan dagiti apostoles ti pannacabalin ti Espiritu ti Dios iti unegda, isu a dida pay matarusan dagitoy a kinacapuyda. Cayatda a mapanunot ida nga isuda papatien, napudno ken naindaclan, a cas ti ayattayo a panangpanunot dagiti tattao cadatayo. Cayatda ti agaramid iti nalinteg, cas maiparangarang babaen cadagiti carcari ti kinapudnoda. ngem nasaysayaat ti pannacaammo ni Jesus.

Di nabayag, babaen ti bael a mangpanunot nga inted ti Espiritu ti Dios, macaawatdanton. Makitadanton no ania ti ammo ni Jesus: a ti amac dagiti dadduma a tattao ringbawanna ti casayaatan ti pannacaiwayatna a planotayo ken panangiparangarang iti kinapudnotayo. Amin dagiti disipulo agtataraydanto no agpeggad ti biagda.

Ilibacto ni Pedro ni Jesus iti publico bayat ti pannacamalmalo ken pannacaibabain ti Apona iti taeng ti nangato a padi.

“Agtugtugaw ni Pedro iti paraangan idi umasideg kencuana ti maysa nga adipen a babai a nagcuna: ‘Uray sica, nakicadcaduaca met ken ni Jesus a taga-Galilea.’ Ngem naglibac ni Pedro iti sangoananda amin. ‘Diac ammo ti sasaoem,’ kinunana. Rimmuar ni Pedro a nagturong iti ruangan. Nakita ti sabali nga adipen a babai ket kinunana cadagiti tattao sadiay, ‘Nakicuycuyog met daytoy a tao ken ni Jesus a taga-Nazaret.’ Naglibac manen ni Pedro ket kinunana: ‘Isapatac a diac am-ammo dayta a tao.’

“Iti saan a mabayag, immasideg kencuana dagiti tattao nga agtatacder sadiay. ‘Agpayso a maysaca cadacuada,’ kinunada. ‘Dayta panagsaom ti pacailasinan.’ ‘Uray dusaennac ti Dios no saan a pudno ti ibagbagac!’ insapata ni Pedro. ‘Diac am-ammo dayta a tao.’ Pagammoan, nagtaraoc ti maysa a cawitan, ket nalagip ni Pedro ti imbaga ni Jesus kencuana: ‘Sacbay ti panagtaraoc ti cawitan, namitlonton nga inlibacnac’ Rimmuar ni Pedro ket nagsangit iti nasaem” (Mateo 26:69-75).

Ipakita ti panaglibac ni Pedro ti kinacapuy ti kinataotayo. No nagtacdertayo iti sapatos ni Pedro iti daytoy nacaam-amac ken nariribuc a tiempo, di bumurong nga ilibactay met ni Cristo. Inlibac ni Pedro ni Jesus iti namitlo a daras ket saan a ti nasanay a Romano a soldado ti nangsalangat ken Pedro; dagiti dua a panaglibacna imbagana cadagiti babbalasang a nagsaludsod kencuana maipapan ti pannakicadduana ken Jesus.

Awan duadua nga impakita ni Pedro ti bassit a tured-nakem ti panangsurotna, iti pangadayoen a disso, cadagiti nangtiliw ken Jesus a nagturong iti paraangan ti taeng ti nangato a padi. Nupay casta, nagbuteng idi nagsaludsodan dagiti agtactacder iti abayna. Sacbay ti pannacapartuat dagiti relo nga adda batingtingna, dagiti cawitan ti nagpaay a pagilasinan iti ibibittac ti parbangon. Ti cawitan a nagtaraoc iti apag-isu a canito ti maicatlo a panaglibac ni Pedro isut’ macatitileng a pacalagipan iti naipaduyacyac a tured-nakem ken kinapudnona. Daytoy macasalbag-puso a pagilasinan ipalagipna ti naayat ken nadungngo a balbalicas ni Jesus, ket nasaem unay ti ladingit ken sangit ni Pedro gapu iti panangilibacna iti Maestro ken gayyemna.

TI PANNACAISUBLI NI PEDRO

Di nabayag, calpasan ti pannacailansa ni Jesus iti crus, pannacaitanemna ken panagungarna, pito dagiti apostoles ti nakicadua ken ni Pedro a napan nagcalap (Juan 21). Nagpatnag a nagdaclisda ngem awan ti nacalapda. Idi sumingisingen ti init iti sumuno a bigat nakitada ti maysa a lalaki iti applaya. Isu ni Cristo, nupay saan nga ammo dagiti disipulo nga Isu.

Kinuna ni Jesus cadacuada: “Annac, adda cadi nacalapanyo?” (versiculo 5). Imbagada Kencuana nga awan a pulos ti nacalapanda. Kinunana cadacuada, “Iwayatyo ti iketyo iti macannawan ti bilog, ket adda maalayo” (versiculo 6).

Inwayatda ngarud ti iket, ket saandan a maisang-at gapu iti caadu ti naalada nga ican. Pagammoan nabigbig ni apostol Juan ni Jesus: “Ni Apo daydiay!” (versiculo 7). Ni Pedro, a sigud a narugso, timmappuac iti danum ket naglangoy a nagpaigid. Simmurot dagiti dadduma nga apostoles iti bilog a mangguyguyod iti iket a napno ti lames. Idi nacasangladdan nakitada ti bumarbara a beggang a pacaituntunoan ti lames, ken adda pay sumagmamano a tinapay iti abayna. Nangisagana ni Jesus iti canenda. Kinuna ni Jesus cadacuada, “Umaycayo mamigaten” (versiculo 7-12).

Calpasan ti panamigatda, sinaludsod ni Jesus ken ni Simon Pedro: “Simon nga anac ni Juan, ad-adda cadi ti panagayatmo Caniac ngem dagitoy?” “Wen, Apo,” insungbatna, “ammom a dungdungngoenca.” Kinuna ni Jesus kencuana, “Taracnem dagiti urbon a carneroc.” Pinidua ni Jesus a sinaludsod, “Simon nga anac ni Juan, ay-ayatennac cadi?” “Wen, Apo,” insungbatna, “ammom a dungdungngoenca.” Kinuna manen ni Jesus kencuana, “Aywanam dagiti carneroc.”

Pinitlo ni Jesus a sinaludsod ken ni Pedro: “Simon nga anac ni Juan, ay-ayatennac cadi?” Nagliday ni Pedro gapu ta iti capamitlona sinaludsod ni Jesus kencuana ti isu met laeng a saludsod, ket insungbat ni Pedro: “Apo, ammom amin a banag; ammom a dungdungngoenca!” Kinuna manen ni Jesus kencuana, “Taracnem dagiti carneroc” (versiculo 17).

Daytoy panagpallatipat ti saludsod ken sungbat ipalagipna cadatayo iti tiempo idi napagsaludsodan ni Pedro iti ibagbagana a kinapudnona ken ni Jesus. Namitlo met a daras a sinaludsod dagiti nagtacder iti sibayna maipanggep iti pannakicaduana iti Apo. Ita namitlo daras a sinaludsod ni Jesus ken ni Pedro maipapan iti ayatna ken kinapudnona Kencuana. Ti naalumanay a panangbabalaw ni Cristo awan duadua nga impaayna ti dackel a kired-nakem iti adalanna.

Imbaga ngarud ni Jesus ken ni Pedro no sadino ti pagturongan ti kinapudno ken kinamatalecna: “Ibagac ti pudno kenca: Idi cabambanuagam, sica ti mangbarbarikes iti bagim ket mapanca iti caycayatmo. Ngem inton lacaycan, nacapuycanton ket sabalinto ti mangbarikes kenca sanaca ipan iti dimo cayat a papanan.” Iti panangisao ni Jesus iti daytoy, impacaammona no casano ti ipapatay ni Pedro tapno maidaydayaw ti Dios. Calpasan nga insawang ni Jesus daytoy, kinunana ken ni Pedro: “Surotennac” (versiculo 18-19).

CASANGCAPAN TI DIOS

Iti dayta naisangsangayan a bigat iti igid ti Baybay ti Galilea, dipay naawat ni Simon Pedro ti Espiritu Santo – ti nasantoan a pannacabalin a mamagbalin iti daytoy managtignay nga apostol iti napudno ken matalec a babaonen.

Di nabayag iti daydi, idi dumteng ti Aldaw ti Pentecostes inted ti Dios cadagiti disipulona iti cari dagiti panawen – ti parabur ti Espirituna (Aramid 2). Manipud daydi nga aldaw nabalbaliwan amin dagiti apostoles ket nagbalinda a lallaki a sitatallugod a mangipeggad cadagiti bibiagda nga agpaay ken Jesus a Mesias (2 Corinto 1:9). Sipupudnonto ni Pedro a mangtaraken ken mangaywan iti arban ken carnero ni Cristo, dagiti tattao nga ayaban ti Dios.

Situtured ni Pedro a nangasaba iti aldaw ti Pentecostes. Dayta ti damo a pannacaammo ni Pedro iti pannacabalin ti Espiritu ti Dios. Dayta a sermonna ti nangipaduyacyac iti cababalin ni Pedro iti entero a panagbiagna, biag a naidaton iti Dios ken iti sangcataoan.

PANANGSUROT ITI PAGULIDANAN NI PEDRO

Aniat’ caipapanan ti ulidan ni Pedro para cadatayo? Makitatayo cadi ti bagbagitayo iti capadasan ni Pedro idiay naangin a Baybay ti Galilea idi timmapuac manipud iti bilog ket sinarangetna dagiti narungsot a dalluyon ti baybay ket nagna nga agturong iti ayan ti Apona? Makitatay cadi ti umabay iti dayta a panagtacder nga agpaay iti Dios ken ti Kinapudno, kinapudno a masansan a maibusor cadagiti pammati dagiti gimong, caaruba ken caamaantayo?

Maysa a mangngalap ni Pedro a binalbaliwan ti Dios a mangngalap cadagiti tattao. Ita pakireden ni Jesus ti nakemtayo a mangtaraken iti carnerona ken mangaywan iti arbanna. Naayabantayo a mangiwaragawag iti ebangheliona iti entero a lubong ken tumulong a mangisagana cadagiti tattao a para iti familia ti Dios. Agbalintayto a mangngalap cadagiti lallaki ken babbai. Awanen iti napangpangruna pay nga aramid ken gundaway iti rabaw ti daga, a cas iti nasursuro ti tao a nanaganan iti Pedro.

PANNAGNA ITI RABAW TI DANUM: Pammati Ngatoen ti Pisica

Malagipyo idi nagna ni Pedro iti rabaw ti danum, uray no sumagmamano laeng a canito? Panunotenyo man daytoy: No pisical ti pagsasaoan, ania dagiti pangundawayan a ti tao macapagna iti rabaw ti danum?

Ipawil dagiti linteg ti pisica iti casta a pasamac. Nupay casta ti Dios a Namarsua pinagmilagrona a pinalubosan iti pannagna ni Pedro iti rabaw ti danum, bayat ti panangimatang dagiti matana ken panangipamaysana iti nakemna ken ni Jesus a Mangisalacan, ti mismo nga Anac ti Dios. Babaen daytoy a milagro nagbalin ni Pedro a nasingsinged ken ni Apona. Daytoy met ti pagayatan ti Dios para cadatayo. Tarigagayan ti Dios ti tunggal maysa cadatayo ti mangpatanur iti nasinged a pannakilangentayo Kencuana.

Daytoy a panangipasimudaag ipakitana cadatayo no casano ti kinapangruna ti pammati cadagiti bibiagtayo. Kinuna ni Cristo a no adda naan-anay a pammati ti maysa [a tao] mabalinanna nga iyalis ti bantay (Mateo 17:20). Ibaga ni Santiago a ti pammati nga awanan aramid natay (Stgo. 2:26). Bimmaba ni Pedro manipud ti bilog gapu ti pammati. Ngem nagcuretret ti pammatina idi naimatanganna ti bileg ti casasaad iti aglawlaw kencuana. Cayat ti Dios a sapulentayo iti bileg, cappia ken kinatalged Kencuana. Ti panggepna cadatayo isu ti panangsanaytayo iti sibibiag, mannacabalin a pammati, ti kita ti pammati a mismo nga impakita ni Jesus.

Nalacatay a kitaen dagiti narugso a tigtignay ni Pedro ket ipagaruptayo a ditay agtignay iti cas inaramid ni Pedro. Nalabit kitaentay ti bagitayo cas nasimsimbeng, managteppel.

Ngem no pudno dayta punto a pagriririan. Ibilang nga inaramat ti Dios iti kinarugso ni Pedro tapno maaramid dagiti bambanag a cayatna a maipatungpal. Saan a masapul ni Jesus a rubruban ni Pedro. Ti apuy, ti kinapinget, ti saldet addan kencuana. Ti casapulan ni Pedro apag-isu ti napnoan anus nga insursuro ni Cristo kencuana: Casano ti panangiturayna ti bagina ken panangsapulna iti panangiturong ken tulong ti Dios tapno mabalbaliwan iti espiritual a ladawan ti Dios. (Efeso 4:22-24; Gen. 1:26).

Di nagbayag, tumulongto ni Pedro a mangidaulo iti pannacaiwaragawag ti ebanghelio iti Pagarian iti entero a lubong, ket casta met a mabaelanto dagiti dadduma a makita iti pannacasapul iti isusucoda iti Dios ken pannacabalbaliwda.

Impatarus ni: Pedro A. Fabroa (From: “Profiles of Faith: Peter – From Fisherman to Fisher of Men,” by Jerold Aust, The Good News, Sept-Oct 2000)