ANG COLOSAS 2:16 NAGAPAKITA NGA ANG MGA
CRISTOHANONG GENTILES
NAGA SAULOG SA MGA ADLAW NGA BALAAN

"Busa ayaw ninyo tugoti nga may magsaway kaninyo sa inyong kan-on o im-non, o bahin sa mga adlaw nga balaan, o sa pangilin sa bag-ong bulan*, o bahin sa Adlaw nga Igpapahulay: nga maoy landong sa mga butang nga umalabot** …" (gi-base ang hubad sa orihinal nga KJV); sumala sa sulat ni apostol Pablo sa mga taga Co-losas nga mabasahan sa Colosas 2:16-17. Kining duha ka mga versiculoha kasagaran ginatuis sa uban. Unsa ba ang tinuod nga kahulogan niining mga tekstoha?

Si apostol Pablo pinaagi sa iyang sulat naningkamot sa pagbuntog sa usa ka mini nga pagtulon-an nga ginapalakaw sa taliwala sa mga Cristohanon sa siyudad nga gihi-nganlag Colosas. Gumikan kay may mga mini nga mga magtutudlo didto nga nag-palakaw sa ilang kaugalingong tinomotumong relihiyosong mga pagtulon-an; diin gisagol nila ang Judiohanon ug paganong mga pagtuo. Tungod sa tipas nilang huna-huna, na-mugna sila ug tawohanong pagtulon-an ug kalibotanong mga pagpanudlo, nga dili gikan sa pulong sa Dios. Busa si apostol Pablo nagpasidaan sa mga taga Colosas nga magban-tay ug magmatngon sila aron dili matunto sa lipatlipat ug tawohanong kaalam nga na-gagikan sa mga pagtulon-an nga gikabilinbilin sa mga tawo, ug gikan sa mga espiritu nga nagahari sa uniberso, apan dili gikan kang Cristo (versiculo 8).

Kining mini nga mga magtutudlo nagapalakaw sa ilang kaugalingong mga pamalaod ug mga pasukaranan base sa ilang kinaugalingong tinomotumo nga insaktong pamatasan (versiculo 20-22). Busa sa mabaskog nga pasidaan ni Pablo sa Iglesia sa Co-losas, masabtan nato nga kining mga mini nga mga magtutudlo maoy sinugdanan sa usa ka dakong mini nga pagtulon-an nga matawag sa ngalang "gnosticism". Usa kini ka klase sa pagtulon-an diin ang sekreto kuno nga kahibalo (gnosis sa pinulongang Griego; diha gikan and pulong nga gnosticism) gituohan nga makadugang sa ilang pagpakarelihi-yoso. Ang mga Gnostics nagpatuo nga tungod kay espirituhanon sila, makasarang kuno sila sa pagsalikway sa mga butang nga physical; ug nga labaw sila niining mga butanga.

Kining mini nga pagtuo sa Colosas nagatudlo sa pagsalikway sa physical nga mga butang - apil ang madunoton nga mahimong mahikapan, matilawan, o makuptan (ver-siculo 21-22) - hilabina kung kining mga butanga may kalabotan sa pagsimba. Kining tawohanong pagtulon-an nagadasig sa pagsalikway sa mga physical nga mga kinahang-lanon sa panglawas aron kuno makab-ot ang labi pang taas nga pagka espirituhanon. Apan sa pagkatinoud, kining katuyoan sa pinugos ug tawhanong relihiyon, wala maka buhat sa ginatinguha nga pagbuntog sa tawhanong kinaiya. Bahin niini si Pablo nagsulat: "apan dili kini matakatabang sa pagpugong sa mga kailibgon sa lawas" (versiculo 23).

Ang mga Cristohanon sa Colosas masinugtanon sa Dios. Nagasaulog sila sa mga Adlaw nga Igpapahulay (Sabado) ug mga Adlaw nga Balaan; ug niining mga adlawa na-gakalipay sila sumala sa mando sa balang kasulatan (Deuteronomio 16:10-11, 13-14).

Sa luyong bahin, ang mga mini nga mga magtutudlo gipakasayop nila ang Iglesia sa Colosas bahin sa pama-agi nila sa pagsaulog sa mga Adlaw nga Balaan. Mamatikdan nato nga dili nila gilalisan ang pagsaulog sa mga nahisgutang mga adlaw. Ang ilang gi-pakasayop hinuon mao ang physical nga paglipay niining mga adlawa-ang pagsadya ug pagkombira-mao kini ang nakahagit sa pagsaway niining mini nga mga magtutudlo.

Palandonga pag-usab ang pulong ni Pablo: "Busa ayaw ninyo tugoti nga may magsaway kaninyo sa inyong kan-on o imnon, o bahin [sa Griego nga pinulongan ang meros, buot sabton 'bahin' o 'mahitungod sa kabahin'] sa mga adlaw nga balaan, o sa pangilin sa bag-ong bulan, o bahin sa Adlaw nga Igpapahulay" (Colosas 2:16).

Busa mabasahan nato nga ginadasig ni Pablo ang mga taga Colosas nga dili nila tagdon ang mga pagsaway sa mini nga mga magtutudlo bahin sa pagsadya nila kabahin sa pagkaon ug pag-inom mahitungod sa pagsaulog sa mga Adlaw nga Balaan.

Pinaagi niining mga tekstoha; walay mabasa nga nasalikway o ginasakliway ang pagsaulog sa mga Adlaw nga Balaan nga gimugna sa Dios. Gani gidasig sila niini bisan sila mga gentil (Colosas 2:13). Gawas pa niini, makapalagan nato nga nagpabilin ang pagsaulog sa mga Cristohanon niining mga Adlaw nga Balaan kapin na sa 30 anyos gikan pa sa pagkamatay ug pagkabanhaw ni Cristo; nga mao ang punto sa tanang kausaban.

Kung pananglitan wala na sila nagasaulog niadtong mga adlawa abtan niadtong panahona; wala na unta'y pagsaway ang mini nga mga magtutudlo alang sa ila-apan tin-aw nga mabasahan nato kini kay mao man ang pagsunod nila sa mga tulomanon alang sa Dios: ang pagsaulog sa mga Adlaw nga Igpapahulay ug mga Adlaw nga Balaan.

* Ang mga Cristohanon sa Colosas naga-ihap sa panahon uyon sa paagi nga gihatag sa Dios sa sinugdanan. Ang panahon sa pagsaulog sa mga Adlawng Balaan nagasunod usab niining pamaagi (Salmo 81:3).

** Ang mga Adlaw nga Balaan nagahan-ay sa umalabot pa nga mga ang-ang sa atong kaluwasan. Gina-paabot pa ang pagbalik sa atong Ginoong Jesu-Cristo nga ginalarawan sa Adlawng Balaan nga Pista sa mga Trompeta (Levitico 23:24; Zacarias 14:4,9; 1Corinto 15:50-57). Ang paggapos kang Satanas ug pag-salin sa iya gikan sa taliwala sa mga katawohan diri sa kalibotan atong ginapaabot pa ug ginalarawan kini sa Balaang Adlaw sa Pagpapas sa mga sala inubanan sa pagpuasa (Levitico 23:27; Gipadayag 20:1-3). Ginapaabot pa nato usab ang paghari sa atong Ginoong Jesu-Cristo dinhi sa yuta; ug ginalarawan kini sa Pista sa Tabernaculo (Levitico 23:34; Isaias 2:2-5; 11:1-16; 35:1-10; Gipadayag 11:15; 20:4-6). Gina-paabot pa usab nato ang pagluwas sa Ginoo sa tanan; apil na ang mga nangamatay sa wala pa matawo si Cristo, ug ang wala pa makadungog bahin sa Manluluwas sa ilang mga sala. Ginalarawan kini sa Pista sa Dakong Adlaw (Levitico 23:36,39; Mateo 11:20-24; Gipadayag 20:11-12; 1Timoteo 2:4; 2Pedro 3:9).

Apil usab niini ang Pascua sa iyang pagkamatay nga gilarawan sa Pangilin o Pagsaylo (Levitico 23:5; 1 Corinto 5:7). Bisan tinuod nga natuman na kin; si Ginoong Jesu-Cristo mismo nagsulti nga saulogon pa nato kini hangtod sa ginapaabot pa nga iyang ikaduhang pagbalik (Mateo 26:29; 1 Corinto 11:23-26).

Ang ikaduha nga Aldaw nga Balaan mao ang Pentecostes [sa Greigo] (Mga Buhat 2:1), o Pista sa Pagpan-gani [sa Hebreo] (Levitico 23:21; Deuteronomio 16:9-12). Bisan tinuod nga may una nang katumanan ni-ini, atong ginapaabot pa ang labing dakong saad sa katumanan sa pagluwas sa tanang katawohan sa kali-butan nga pagasugdan sa pagtigum sa mga Israelitas (Jeremias 31:31-34; Ezequiel 36:25-38; Ezequiel 37).

Hinubad ni Pastor Edmond D. Macaraeg base sa maong tema sa pagina 60-61 sa "GOD'S HOLY DAY PLAN, the promise and hope for all mankind" © 1997 United Church of God, an International Association. Alang sa mga pangutana ug dugang pa nga impormasyon; o LIBRE nga mga balasahon; palihog pagpadala ug sulat sa: P. O. Box 81840, DCCPO, 8000 Davao City, Philippines; o mahimong motawag usab sa telepono numero (0 82) 224-4444 or text sa 0918-904-4444; o mosulat gamit sa computer e-mail: info@ucg.org.ph. [04-26-06]